مرحوم ياشخص عزيــــز فقدته...

يا موت تكفى رجع الي اخذته

الصاحب الي ضحكته تبري الروح

شف حالتي يا موت جسمي نحلته

خله معي يا موت لو يوم ويروح

وين الصبر يا ناس قلبي فقدته

وش لي بدنيا ما بها ضحك ومزوح

وين الصبر يا ناس قلبي فقدته

راح الاخو راح الخوي راحت الروح

يبوني انسى شخص مبطي سكنته

اهو سكني وصرنا اثنين في روح

مرحوم يا شخص عزيز فقدته

راح وتركني شايل الهم مجروح

وصيتي لين مت وقبري دخلته

حطوني جنبه وانا فاقد الروح

يهل دمعي لين مني ذكرته

طيفه معي من وين ما جيت واروح

لا تذرفون لدمع دامي وصلته

خلوني بجنبه اسد جرح مفتوح

البارحه صدري به الهم مكنون
اسهر بليل وليل الاحزان طالي

ماغير ابدّل حالة الضيق بالهون
وفكري بذهني للوساويس شالي

جريت صوت الحزن والقلب مطعون
كني على ظهر البسيطه لحالي

والفجر بيّن واكثر الناس يدعون
ربٍ كبيرٍ مايرد السؤالي

صليت فرضي مع عبادٍ يصلون
ودعيت رب البيت يستر خمالي

ورجعت داري ناوي النوم بسكون
والنوم عيّا.. لايقرب مجالي

والظهر قرّب واكثر الناس يمسون
وانا وبين الهم بألف احتمالي

والباب دق وصحت ابيهم يردون.!
جاني الولد يصرخ ترى الضيف خالي

والخال اقبل والحزن تقل مدفون
في وسط صدره وكن شيٍ طرالي

قال البقيه براسكم عل تبقون
هذا القدر مكتوب من عند والي

ماني مصدق مسمعي لاتقولون
ابوي عايش خل عنك الهبالي

ماني مصدق هالخبر لاتلومون
توه مكلمني وسائل بحالي

وضعه سليم وصحته ماهي بدون
حتى الورم شالوه واظن زالي

قالوا لكلاه اليوم لازم يغسلون
حتى الريه ادمت وفيها اختلالي

والكبد راحت والورم صدق ملعون
اللي تمكن فيه اول وتالي

قالوا توفا قلت ياناس تكفون؟
وشلون راح اللي به القلب سالي

جابوه يوم الاربعاء نقل مشحون
وعصر الخميس بيدفنونه بحالي

جابوه للمسجد وقاموا يغسلون
بالمسك والكافور يمن وشمالي

وحطو النعش فوقه وقامو يلفون
جسمٍ كريمٍ مايعوض بـ مالي

ناظرت وجهه مبتسم وجه مزيون
حبيت راسه ثم خشمه بعالي

صلو عليه وداخلي هم و حزون
ودعيت ربٍ مايرد ابتهالي

سلّم وسلمنا وقامو يشيلون
جثمان غالي مايفكّه جدالي

حطّوهِ في قبره وقاموا يهلّون
عليه دمعِ مثل وبل الخيالي

جسلت صوب القبر والحزن مسجون
في وسط قلبي والمحاجر سيالي

وقمت اشتكيله حالتي وماهو جنون
ودي اسولف له بشيٍ ف بالي

يابوي تكفا لا تخليني بـ هووون
وشلون اعيش بدنيتي بانعزالي

وشلون ابعرس دونك اليوم وشلون.؟؟
وقت التهاني مين ابلقى قباااااالي

ولامن رثتني دنيتي بحال مطعون
منهو يساندني بذيك الليالي

يابوي صارت دنيتي مالها لون
ماعدت افرق بين مرٍ وحالي

مرحوم ياللي بالسخيات مضمون
مرحوم ياللي بالمهمات جالي

شهمِ عزيزٍ للصعيبات مامون
كلن يحبك من عمام وخوالي

ماقد تأنى بالكرم لجل مخزون
مدّت يدينه من تحتها ظلالي

حتـى حلاــك يفقــدك دوم يبكون
ما الوم لو يبكي عليك الحلالي

مرحوم ياللي بالكرم كان مفتون
تبقى وتبقى داخل القلب غالي

مرحوم ياللي سمعته نعم مليون
يدفع ثمينه لجل ربط الوصالي

عساك تحشر مع عبادن يصومون
مع النبي المصطفى بالعلالي

عسا القبر روض به العز مصيون
يارب يامعبود ياذا الجلالي

يا رب يا معبـود يـا عالـم الغيـب
يا منجياً عبدك من الحـزن والضيـم

يالخالق الرازق ويا كاشـف الريـب
انت العظيم اللـي عـلا كـل تعظيـم

تقبـل دعـاوي أهلهـا والأصاحيـب
وتجعل أوائـل داخلـي جنتـك ريـم

شهرك كريمٍ.. وأوله رحمه وطيـب..
وانت الكريم اللـي طلبنـاك تكريـم

وانت العزيز اللي يعـز المطاليـب..
جبار متكبر.. ولا أحصـاك تقييـم...

الخالق، البـارئ، بديـع التراكيـب..
مصور الاشكال.. بالخلق ومديـم...

غفار، قهار، العـدا خالـي العيـب..
وهـاب، رزاق المـلا بالتقاسـيـم..

فتـاح للـي يشتكـي بالمراقيـب..
ظلم وقهـر.. والا بقايـا لوازيـم..

انت العليم بكل ما يحـوي الغيـب..
القابض، الباسط.. بكـل المفاهيـم..

الخافض، الرافع.. اليك المهاريـب..
معزّ، ومـذلّ.. الخلايـق بتحكيـم..

رب(ن) سميع(ن) نرتجيك التراحيب..
في روحها.. وانعم عليها بتنعيـم...

انت اللطيف، الطف عليها من الريب..
وانت الخبير، بحالها دون توهيـم...

انت الحليم، اخشى عليها لواهيـب..
انت العظيم، امطر عليها من الديم...

رب(ن) حكيم(ن) حكمته دايم تصيب..
رب(ن) ودود(ن) في عطاياه تنظيم...

يالله أنا داعيك.. يا وافـر الطيـب..
وألجئ لعطفك... يا كفيل المظاليم...

تقبـل دعـاوي أهلهـا والأصاحيـب
وتجعل أوائل داخلي جنتـك ريـم...